Ályktun félagsfundar 1. maí 2010

Félagsfundur Samfylkingarinnar á Akureyri, sem haldinn var laugardaginn 1. maí 2010, samþykkti svohljóðandi ályktun:

 Við berum okkar ábyrgð

 Fundur Samfylkingarinnar á Akureyri, verkalýðsdaginn 1. maí 2010 skorar á forystu Samfylkingarinnar að halda áfram þeirri umbótarvinnu sem hófst með birtingu bókhalds flokksins og einstakra frambjóðenda frá árinu 2002.

 Samfylkingin var flokka fyrst að auka gegnsæi og byrja á þeirri vinnu að endurheimta traust kjósenda.

 Þá hefur flokkurinn kosið sérstaka nefnd sem fjalla á um umbætur og skoða innra starf flokksins.

 Stjórnmálaflokkar og flokksmenn þeirra verða að taka til í eigin ranni.

 Því er skorað á forystu Samfylkingarinnar að af hálfu flokksins verði viðurkennd sú ábyrgð sem flokkurinn ber á því hruni sem dundi yfir þjóðina.

 Hér ber ekki einungis að  líta til lagalegrar ábyrgðar, sú siðferðislega er ekki síður mikilvæg.

 Samfylkingin biðst afsökunar á að hafa átt þátt í þeim trúnaðarbresti sem orðið hefur en væntir þess að vinna fullt traust kjósenda á ný.