Stjórn Samfylkingarinnar á Akureyri hefur borist ein tillaga að ályktun til félagsfundarins þann 3. febrúar n.k. Til félagsfundarins er boðað að frumkvæði félagsmanna um stöðu Samfylkingarinnar á landsvísu.
Hún er þannig:
“Allt frá lokum síðasta kjörtímabils hefur fylgi Samfylkingarinnar á landsvísu farið minnkandi. Núverandi forystu Samfylkingarinnar hefur ekki tekist að skapa traust kjósenda á flokknum. Til að ná Samfylkingunni upp úr þeirri djúpu lægð sem hún er nú í telur Samfylkingin á Akureyri nauðsynlegt að boðað verði til landsfundar fyrir vorið. Þar gefist forystunni tækifæri til að endurnýja umboð sitt eða nýr formaður og forysta verði kjörin. Það má ekki seinna vera til að nýrri forystu gefist tími til að undirbúa málefni, efla starf flokksins og stuðla að endurnýjun fyrir næstu alþingiskosningar.
Jafnaðarstefnan á mikinn stuðning meðal Íslendinga og jafnaðarmenn á Íslandi þurfa að endurvinna traust kjósenda. Til að svo megi verða er nauðsynlegt að kjósendur trúi því að Samfylkingin standi vörð um hefðbundin baráttumál jafnaðarmanna.
Samfylkingin á Akureyri hvetur önnur samfylkingarfélög til að taka undir þessa ályktun. Í stöðu eins og nú er uppi verða almennir flokksmenn að láta til sín taka þegar forystunni hefur mistekist að halda baráttumálunum á lofti og knýja fram nauðsynlegar þjóðfélagsbreytingar fyrir almenning á Íslandi.”
Tillagan verður lögð fram á félagsfundinum sem haldinn verður í Lárusarhúsi miðvikudaginn 3. febrúar kl. 20.
