Archive for Fréttir

Landsfundur Samfylkingarinnar 2. – 3. mars n.k.

Helgina 2.-3. mars n.k. verður landsfundur Samfylkingarinnar á Hotel Natura í Reykjavík. Samfylkingin á Akureyri mun boða til félagsfundar þann 29. janúar n.k. þar sem verður farið yfir niðurstöður málefnanefndar og geta þá félagsmenn komið með breytingartillögur eða nýjar ályktanir sem lagðar verða fyrir landsfundinn.

Smellið á linkinn hér að neðan til að lesa tillöguna:

Eitt samfélag fyrir alla_Tillaga að stefnu Samfylkingarinnar fyrir landsfund 2018

 

Lárusarhús afhent nýjum eiganda

Mánudaginn 8. janúar var Gleypni ehf afhent Lárusarhús en Samfylkingin seldi húsið í október. Helgina 6.-7. janúar kom fjöldi sjálfboðaliða í Lárusarhús og unnu við að tæma húsið. Verkið gekk mjög vel fyrir sig en talsvert miklu magni var hent sem var inn í húsinu. Allar myndir sem voru í myndasafni Norðurlands ásamt myndum úr félagastarfi síðustu áratuga var komið á Minjasafnið. Fundarbækur voru settar á Héraðsskjalasafnið.

Það er hollt fyrir félagasamtök að fara í gegnum svona tiltekt en margar skemmtilegar og góðar minningar voru rifjaðar upp í tiltektinni. Stjórnin er núna að vinna í því að skoða möguleika í húsnæðismálum og verður boðað til félagsfundar um það vonandi fljótlega.

Ályktun til aðalfundar

Ályktun hefur borist til aðalfundar og verður hún til umræðu á aðalfundi.

Ályktun aðalfundar Samfylkingarinnar á Akureyri 30. mars 2017 um húsnæðismál

 

Aðalfundur Samfylkingarinnar á Akureyri hvetur stjórnvöld til að gera nú þegar stórátak í húsnæðismálum til að bregðast við bráðavanda og byggja upp samfélagslegar lausnir til framtíðar.

Núverandi ástand þar sem fjársterkir aðilar hafa átt þátt í að hækka söluverð á íbúðum til að leigja almenningi með milljarða gróða er óásættanlegt, og má ekki láta afskiptalaust af stjórnvöldum.

Það er ein af grundvallarskyldum stjórnvalda að tryggja fólki öruggt húsnæði á viðráðanlegu verði.  Án aðkomu ríkisvaldsins verður það ekki gert og til þess hafa stjórnvöld margar leiðir.

Byggja þarf þúsundir leiguíbúða, bæði niðurgreiddar fyrir tekjulága, og til að koma á virkum leigumarkaði, þannig að leiga sé valkostur fyrir fólk til lengri tíma.  Stjórnvöld þurfa að nota það afl sem þau hafa til að fjármagna húsbyggingar á lágum vöxtum til langs tíma, t.d. með því að ríkið taki lán í evrum og endurláni til leigufélaga sem byggja leiguíbúðir og reka án hagnaðarsjónarmiða.  Með því mætti lækka húsnæðiskostnað verulega.

Jafnframt þarf í samvinnu við sveitarfélög að endurvekja svokallað Verkamannabústaðakerfi í þeirri mynd sem nú hentar.  Án þess er vafasamt að takist að byggja upp aukið húsnæði á landsbyggðinni, þar sem víða er brýn þörf og húsnæðisskortur stendur vexti byggðarlaga fyrir þrifum.

Það verður að horfast í augu við að séreignastefna hægriflokkanna í húsnæðismálum er hrunin og að Íslendingar þurfa sem fyrst að taka upp þær lausnir sem best hafa reynst í nágrannalöndum okkar.  Varanlegar lausnir byggja á því að litið sé á húsnæðismál sem samfélagslegt verkefni, en ekki leikvöll hinna ríku til að hafa almenning að féþúfu, sem leiguliða.

Samfylkingin á Akureyri hvetur stjórnvöld til að hefjast handa strax öllum almenningi til heilla. Þrátt fyrir eitt lengsta hagvaxtarskeið í sögunni  eru húsnæðisskortur og húsnæðisokur þegar farin að rekja ungt og vel menntað fólk, sem á val um að starfa erlendis, frá landinu.  Það er í valdi stjórnvalda að koma í veg fyrir þessa válegu þróun og þar skipta húsnæðismál miklu máli.

 

 

Aðalfundur Samfylkingarinnar á Akureyri

Aðalfundur Samfylkingarinnar á Akureyri verður haldinn fimmtudaginn 30. mars n.k. kl. 20 í Lárusarhúsi. Logi Einarsson, formaður Samfylkingarinnar verður sérstakur gestur fundarins.

Dagskrá aðalfundar
Ákvörðun um starfsmenn fundarins
Skýrsla stjórnar,
Ársreikningar félagins fyrir næstliðið ár lagðir fram
Umræður um skýrslu stjórnar og afgreiðsla ársreiknings,
Kosning formanns,
Kosning annarra stjórnarmanna,
Kosning tveggja skoðunarmanna og eins til vara
Kosning kjörstjórnar til eins árs
Ákvörðun um árgjald félagsins
Önnur mál.
-Lárusarhús, staðan og framhaldið
-Logi Einarsson

Þeir sem hafa áhuga á að bjóða sig fram í stjórn geta sett sig í samband við formann kjörstjórnar Unnar Jónsson, unnar@live.com.

arsreikningur2016

Landsfundur Samfylkingarinnar – fulltrúar

Ef þú hefur áhuga á því að vera fulltrúi Samfylkingarinnar á Akureyri á landsfundi Samfylkingarinnar þann 3.-4. júní á Grand Hótel Reykjavík þá er síðasti skráningardagur 11. maí kl. 20.  Vinsamlegast skráið ykkur með að senda tölvupóst á joijons78@gmail.com